Ceritaan Masa Pandemi : Kudu Balik Ke Rumah Nih

Ceritaan Masa Pandemi : Kudu Balik Ke Rumah Nih

 

Mathar Kamal

Akhirnya, biar dalam situasi PSBB akibat Pandemi Covid-19, Fauzi jadi menikahi Mumun, perempuan yang lama didemenin. Fauzi yang bole dibilang anak baek, tawadhu, ikhlas jalani hidup, tau kalo die bersabar dalam situasi sulit sekarang. Begitu juga Mumun, ude nerima ape adenye.
Sebage temen, Fauzi sempet juga berbagi cerita masa indah pernikahan dan rumah tangganya dimasa Pandemi Covid-19.
Fauzi ketika jumpa di tempat kongkow di Kemayoran, cerita masa awal pernikahan nya. Mungkin lantaran masih asyik dan mesra, rasanya pengen juga Fauzi cerita buat temennye.

Fauzi sejak menikah, tinggal di pinggiran Jakarta. Die juga beruntung, masi ade temen lamanye yang ngajak kerja, biar kate belon tetep akibat keadaan. Tapi, kerna Fauzi sabar, berape aje pengasilan nye, tuh kerjaan tetep dilakonin. Pan, seenggaknye, die kagak malu ama keluarga bininye. Masa berani nikah dijaman susah, masa Pandemi Covid-19 kudu nganggur.
Sebagai pekerja yang tidak tetap, Fauzi selalu jalan pagi-pagi banget. Apalagi tempat kerjanya jauh dari rumahnya di pinggiran Jakarta.

Alhamdulillah, biar sepeda motor seken, tapi lumayan membantu pergerakan cari nafkah. Itu motor pemberian abangnya sebagai kado pernikahan. Kerna tinggalnya, kontrakannya agak masuk kampung, jauh dari jalur angkot.

Di kampung sih, biar masih gelap, lewat subuh, orang perempuan ude pade keluar. Umumnya jemur baju atau nyapu halaman.
Umumnya, tuh perempuan kerna ude biasa, pakeannya rada ngegoda. Padahal ude terang tanah dan keliatan cuma pake kutang ama kemben yang kadang naek tu kaen ampe paha.

Suatu waktu, Jum’at pagi, Fauzi mau jalan, tapi motornye ngadat. Die akhirnye tuntun tu motor, mau diperbaiki ama temennye yang deket jalan raya. Fauzi disapa ama orang perempuan kampung situ, dan die sambut sambil mesem. Ade beberapa perempuan yang mungkin ude biasa ama pakeannya, malah bikin pusing Fauzi.

Perempuan muda montok yang lagi ngejemur, bikin Fauzi semakin pusing. Ade juga yang nyapu gak liat keadaan, tuh perempuan ngongkong. Ape yang diliat Fauzi, bikin lemes nuntun motornye. Pikirannya kacau menterjemahkan ape yang diliat.

Entah gimane, Fauzi asyik dialog batin dan keingetan omongan ustadz malem Kemis. Pak ustadz bilang, sebagai suami harus jaga martabat, jangan ampe kegoda perempuan diluar rumah.
Terus, pak ustadz bilang, kalo kite mau jalan usaha dan ketemu pemandangan yang bikin birahi, mending balik aja dulu supaye ati ama pikiran lebi tenang. Jujur aje bilang ama bini, kalo kite kegoda perempuan, jadi kepaksa pulang. Ini juga dikasi tau ama Rasulullah, jadi, gak ape-ape ekstra nambah ibadah pagi ari.

Tetep atinye Fauzi, die belokin motornye, dituntun balik ke rumahnye. Bininye rada kaget, kok suaminye balik lagi sih. Dalem ati si bini, mungkin bengkel yang dituju tutup.

Fauzi gak denger omongan bininye, tapi sempet jawab salam. Abis standarin motor, Fauzi rambet tangan bininye ajak masuk, langsung ke kamar. Bininye nurut aje, ikut masup ke kamar. Bininye nanya-nanya, Fauzi gak ladenin, die sosor bininye.

Kelar semua urusan di kamar, kire-kire kul sembilan, Fauzi bilang ke bininye, die gak jadi berangkat kerja, lantaran lemes. Fauzi jelasin, die cuma ikut ape yang Nabi Muhammad Saw kasi tau. Daripade ngeganggu iman dari pemandangan perempuan, mending balik ke rumah aje, yang sah dan halal. Bininye manggut-manggut dan nanya, ape Abang mau nambah.
(Parung, awal Februari’21, AMK-IK)

Tinggalkan Balasan