Ceritaan Masa Pandemi KEIKHLASAN SANG BINI

Ceritaan Masa Pandemi KEIKHLASAN SANG BINI

 

Bang Mukhlis, dikenal sebage orang yang rajin, juga ibadahnye bagus. Sering bantu siape yang perlu. Bahkan, selama Pandemi Covid-19, masih juga ikut bersih-bersih mesjid dan mandiin jenazah.
“Kite lakonin aje kebaekan, rezeki pan udeh diatur. Jangan suuzhon ama Allah” Begitu omongan bang Mukhlis yang kalo bantu orang gak ngarep ape-ape, apelagi minta-minta kerna berjasa.

Masih keinget cerite bininye, Mumun ketika mau masup puasa Ramadhan taon lalu. Waktu itu pan ude PSBB dan Bang Mukhlis ude sering dirume aje. Mumun bininye, juga perempuan luar biasa tawadhu, ikhlas dan sabar adepin keadaan.

Malem terakhir Rowah, Mumun dan bang Mukhlis kelar sembayang Isya, makan nasi goreng ala kadarnya. Masih kebayang ama Mumun, lakinye bikin nasi goreng dari sisa nasi siang. Cuman irisan bawang ama cabe, tamba mentega yang juga sisa, itulah nasi goreng sepanjang idupnye bersama bang Mukhlis. Abis itu, Bang Mukhlis ajak Pok Mumun Sembayang Taraweh.

Abis zikir dan wirid usai sembayang Isya, tu laki bini niat langsung tidur, kerna ntar sahur pertama puasa Ramadhan. Tapi sebelon masup kamar, Mumun bilang ke lakinye.
“Bang, ntar sahur pake ape, makanan ape, kalo nasi Mumun ude masak sih. Lauknya belon ketauan”.
Mukhlis manggut-manggut, die buka kulkas rongsok, ternyata cuma ade es dalem plastik, gak ade bahan makanan buat dimasak. Udahan di dapur, gak ade ape-ape.
“Yaa, Mun. Tenang aje, ntar abang keluar bentaran, ke pasar deh. Pokoknye Abang masakin khusus sahur pertama yang nikmat”. Bang Mukhlis bilang ke bininye. Padahal dalem atinye, seperak gak pegang duit. Tapi die yakin Allah Maha Pemberi Rezeki. Bang Mukhlis kelar bepakean dan sepatu, pamit ama bininye. Tujuannye ke sebuah pasar bejarak ampir dua kilometer.

Sekalian silaturahmi puasa, niat Bang Mukhlis mau pinjem duit ama temennye yang jadi Satpam pasar dan atu orang yang dagang sayuran. Die yakin kul setenge dua ude sampe rume lagi. Paling masak sejem setenge, kul setenga empat siap sahur. Bang Mukhlis jalan susuri trotoar sambil zikir dan wirid.

Dirume, Pok Mumun kebangun kul dua dan atinye berasa gak enak. Lakinye orang sigrep, tepat waktu dan gak doyan maen kesono kemari. Meski tau kalo lakinye keluar rume gak punya duit, Pok Mumun yakin Allah Taala pasti ngasi rezeki.

Pok Mumun ngelongok keluar rume, terus balik kedalem. Baru aje mau ngunci rume, kedengaran suara orang kasi salam. Pok Mumun buka pintu dan kaget. Ade beberapa orang dan satu pulisi. Semua dipersilahkan masup kedalem rume.

Ustadz Ahmad Yani yang ketua mesjid dan Pak Yunus yang ketua RW, jelasin maskud kedatengannye.
“Maaf nih Pok Mumun. Kite mau kasi kabar. Emang berat sampeinnye, tapi kudu wajib juga. Tadi saye kedatengan pak pulisi, katenye Bang Mukhlis suami Mpok meninggal ketabrak mobil deket pasar”.
Pak Yunus sebage RW nambahin.
“Mpok yang sabar aje. Ikhlasin, kerne ini ude Takdir Allah. Kite ama yang laen yang bakal ngurusin jenazahnye bang Mukhlis ampe pemakaman. Nanti pak RT dianter pak pulisi yang bakal jemput jenazahnye”.

Pok Mumun berase ngembeng aermatenye. Die kuatin diri dan ikhlas nerima keadaan yang gak perlu diseselin. Die ucapin terime kasi ama orang-orang yang kasih kabar duka dan bakal ngebantu ngurus segalanye. Kerna mau sahur pertama, rame orang dateng bawa ini-itu sambil berdoa buat kekuatan Pok Mumun.

Luar biasa tegar-nye Pok Mumun. Sodara-sodaranye dan sodara lakinye pade nangis, tapi Pok Mumun cuma basah pipi aje, gak kayak orang laen gegerungan ditinggal mati lakinye.

Ketika berdiri didepan pager rume, Pok Mumun senyum dan bicare seolah didepan bang Mukhlis.
“Bang, kite gak tau rahasia Allah. Abang menghadap Allah di bulan mulia, dan abang pergi tadi keliatan kalo abang jalannye menuju sorga. Doain juga saye bang, tungguin saye”
(Tenabang, Ramadhan 2021, amk-ik)

Tinggalkan Balasan